"ಒಲವ ಮೋಡದಲ್ಲಿ"

ನನ್ನೂರ ಕಡೆಯಿಂದ
ನಿನ್ನೂರ ಕಡೆಗಿಂದು
ಹೊರಟ ಒಲವ ಮೋಡದಲ್ಲಿ
ಬರೆದಿಹೆನು ಪ್ರೀತಿ ಪದವ
ಬರಬಹುದು ಇನ್ನೇನು
ತಂಗಾಳಿಯ ಜೊತೆಯಲ್ಲಿ
ಕಾಯುತಿರು ಅಲ್ಲಿ ನೀನು
ನನ್ನೊಲವು ಬರುವಲ್ಲಿ

ಗುಡುಗು ಮಿಂಚಿನೊಡ್ಡೋಲಗ
ಪ್ರೀತಿ ಮಳೆಗೆ ಇಂದು 
ಬರುವ ಹಾದಿ ಹೂಗಳೆಲ್ಲ
ನಲಿಯಲಿವೆ ಮಳೆಗೆ ಮಿಂದು
ಎದೆ ನದಿಯು ತುಂಬಲಿದೆ
ಒಲವ ಕಡಲ ಸೇರಲಿದೆ
ನಿನ್ನ ನಗುವ ನೋಡಲು
ನನ್ನೊಡಲು ಹಸಿದಿದೆ

ಅಗೋ! ಮೇಘವು ಸುರಿಸಿತು
ನನ್ನ ಪ್ರೀತಿ ಪದದ ಮಳೆಯ
ಹನಿಯಾಗಿ ಹನಿಯಾಗಿ
ನನ್ನೊಲವ ಧನಿಯಾಗಿ
ಮೇಲಿಂದ ಧರೆಗಿಳಿದು
ತಾಕುತಿವೆ ನಿನ ಕಂಗಳ
ಬಿಟ್ಟೂ ಬಿಡದೆ ಹಟಹಿಡಿದು

ಸಮ್ಮತಿ ಬೇಡಿದೆ ಪ್ರೀತಿ
ನಿನ್ನೆದುರಲಿ ಮಂಡಿಯೂರಿ
ಬರಡಾದ ನನ್ನೆದೆಗೆ
ಚೆಲ್ಲಿಬಿಡು ಒಲವ ಹನಿ
ಚಿಗುರಲಿ ನನ್ನೆದೆಯಲಿ
ಒಲವ ಹಸಿರು ನಿನ್ನಿಂದಲೆ
ಉಸಿರಿಗುಸಿರು ನಿನ್ನಿಂದಲೆ

------------------------
"ಭಾವಕಣ"

"ನಿನ್ನೊಡಲಲಿ"

ನಿನ್ನ ಕಾಣದೆದೆಯು
ಗುಡುಗುತ್ತದೆ ಗುಡುಗಂತೆ
ಸಿಡಿಯುತ್ತದೆ ಸಿಡಿಲಂತೆ
ಬಿರುಗಾಳಿ ಮಳೆಸುರಿಸಿ
ಕಡಲುಬ್ಬಿ ಬಂದಂತೆ
ಹೂ ಕಂಪು ಉಸಿರಿರದೆ
ಬಿಸಿಲಲ್ಲಿ ಉರಿದಂತೆ

ಚಂದಿರನು ಚಿತೆಯೇರಿ
ತಾರೆಗಳು ಅಸುನೀಗಿ
ಕತ್ತಲೆಯೇ ಎದೆನಭವ
ಆಳುತಿದೆ ನೆನಪಾಗಿ
ಕಣ್ಣಹನಿ ಹೊರಬರದೆ
ಕರಗುತಿದೆ ಕಣ್ಣೊಳಗೆ
ಉಸಿರೇ ಉಸಿರಾಟ ಮರೆತು
ರೋದಿಸಿದೆ ಎದೆಯೊಳಗೆ

ನೀ ಎದುರಲಿ ನಿಂತರೆ
ನಿಲಬಹುದು ತೊಳಲಾಟ
ಈ ಮನಸಿನ ಹೊಯ್ದಾಟ
ನಸುನಗುತಾ ನಿಂತುಬಿಡು
ಕದಲದೇ ನೀ ಸುಮ್ಮನೆ
ಎದೆಹಟವ ಬಿಡಬಹುದು
ನಿನ್ನ ಮುದ್ದು ಮುಖ ಕಂಡು
ಬಿಗಿದಪ್ಪಿಬಿಡು ಒಮ್ಮೆ
ಸಾವಿರ ಜನ್ಮವ ಕಳೆವೆ
ನಗು ನಗುತ ನಿನ್ನೊಡಲಲಿ

-------------------------
"ಭಾವಕಣ"