"ಒಲವ ಮೋಡದಲ್ಲಿ"

ನನ್ನೂರ ಕಡೆಯಿಂದ
ನಿನ್ನೂರ ಕಡೆಗಿಂದು
ಹೊರಟ ಒಲವ ಮೋಡದಲ್ಲಿ
ಬರೆದಿಹೆನು ಪ್ರೀತಿ ಪದವ
ಬರಬಹುದು ಇನ್ನೇನು
ತಂಗಾಳಿಯ ಜೊತೆಯಲ್ಲಿ
ಕಾಯುತಿರು ಅಲ್ಲಿ ನೀನು
ನನ್ನೊಲವು ಬರುವಲ್ಲಿ

ಗುಡುಗು ಮಿಂಚಿನೊಡ್ಡೋಲಗ
ಪ್ರೀತಿ ಮಳೆಗೆ ಇಂದು 
ಬರುವ ಹಾದಿ ಹೂಗಳೆಲ್ಲ
ನಲಿಯಲಿವೆ ಮಳೆಗೆ ಮಿಂದು
ಎದೆ ನದಿಯು ತುಂಬಲಿದೆ
ಒಲವ ಕಡಲ ಸೇರಲಿದೆ
ನಿನ್ನ ನಗುವ ನೋಡಲು
ನನ್ನೊಡಲು ಹಸಿದಿದೆ

ಅಗೋ! ಮೇಘವು ಸುರಿಸಿತು
ನನ್ನ ಪ್ರೀತಿ ಪದದ ಮಳೆಯ
ಹನಿಯಾಗಿ ಹನಿಯಾಗಿ
ನನ್ನೊಲವ ಧನಿಯಾಗಿ
ಮೇಲಿಂದ ಧರೆಗಿಳಿದು
ತಾಕುತಿವೆ ನಿನ ಕಂಗಳ
ಬಿಟ್ಟೂ ಬಿಡದೆ ಹಟಹಿಡಿದು

ಸಮ್ಮತಿ ಬೇಡಿದೆ ಪ್ರೀತಿ
ನಿನ್ನೆದುರಲಿ ಮಂಡಿಯೂರಿ
ಬರಡಾದ ನನ್ನೆದೆಗೆ
ಚೆಲ್ಲಿಬಿಡು ಒಲವ ಹನಿ
ಚಿಗುರಲಿ ನನ್ನೆದೆಯಲಿ
ಒಲವ ಹಸಿರು ನಿನ್ನಿಂದಲೆ
ಉಸಿರಿಗುಸಿರು ನಿನ್ನಿಂದಲೆ

------------------------
"ಭಾವಕಣ"