ನಮ್ಮನ್ಹುಟ್ಸಿದ್ಯಾವ್ರು

ನಮ್ಮನ್ಹುಟ್ಸಿದ್ದ್ಯಾವ್ರೇ ನೀನು

ಎಲ್ಲಿಗ್ಹಾಳಾಗ್ಹೋದೆ

ನಮ್ಗೋಳು ಕೇಳಾದ್ಬುಟ್ಟು ಬೇರೆ

ಕೆಲ್ಸ ನಿಂಗೇನದೆ

ಇರೋರ್ಗೇನೆ ಎಲ್ಲಾ ಬಿಟ್ಟು

ಇಲ್ದೋರ್ಗೆಲ್ಲಾ ಕೈಯ ಕೊಟ್ಟು 

ಗುಡಿವಳ್ಗೆ ಆರಾಮಾಗಿ 

ಯಾಕೆ ಕುಂತ್ಕಂಬುಟ್ಟೆ 

ನಿಂಗೆ ನೂರಾರ್ ಹೆಸ್ರಿಟ್ಟವ್ರೆ

ದೊಡ್ದೊಡ್ಗುಡಿ ಕಟ್ಟಿ

ಹಾಲು ತುಪ್ದಲ್ತೊಳೀತವ್ರೆ 

ನಿನ್ನ ಮೈ ಕೈ ಮುಟ್ಟಿ

ಜಾತಿಗೊಂದು ದೇವ್ರ್ಮಾಡ್ಕಂಡು 

ದಿನಾ ಕಚ್ಚಾಡ್ತಾರೆ

ನಿನ್ನ ಹೆಸ್ರ್ಹೇಳ್ದುಡ್ಮಾಡ್ಕಂಡು

ಲೂಟಿ ಹೊಡೀತವ್ರೆ

ಉಂಡವ್ರೆಲೆಲ್ಹೊರ್ಳಾಡಿದ್ರೆ

ಪಾಪ ಕಳ್ದಂಗಂತೆ

ಭೂಮಿ ಬಗ್ದು ಕಿರಿಟ ಇಟ್ರೆ

ನೀನೊಲಿತಿಯಂತೆ

ಅವ್ಹೇಳ್ತಿದ್ಲು ಈ ನೆಲ್ದಲ್ಲಿ

ನೀನೊಡಾಡ್ತಿದ್ದಂತೆ

ಕಷ್ಠ ಹೇಳಕ್ಬಂದ್ರೆ ಯಾಕೆ

ಹಂಗೆ ಕದ್ಹೋಡ್ದಂತೆ?

ಕೇಳಿದ್ದೆಲ್ಲಾ ಕೊಡೂ ನಿಂಗೇ

ಕೊಡ್ತಾರ್ಚಿನ್ನದ್ಗಟ್ಟಿ

ಬಡವನ್ಮನೇಲನ್ನ ಇಲ್ಲ

ಹೊಟ್ಟೇಗ್ತಣ್ಣೀರ್ಬಟ್ಟಿ

ಧರ್ಮ ಗಿರ್ಮ ಅಂತ ಮಾಡ್ಕಂಡ್

ಕರ್ಮ ಮರ್ತವ್ರೆಲ್ಲಾ

ಇನ್ಹತ್ಸಾರಿ ಹುಟ್ಟೀದ್ರೂನು

ನಿನ್ಮರ್ಮ ತಿಳ್ಯಾಕಿಲ್ಲ

ನೀನೆ ಹೇಳು ನೀನ್ಮಾಡಿದ್ದು

ನಿಂಗೆ ಸರಿ ಐತ

ಬುದ್ಧಿ ಕೊಟ್ಟು ಸ್ವಾರ್ತದ್ಜೊತೆಗ್

ಆಸೆ ಕೊಡ್ಬೇಕಿತ್ತ

ಪಾಪ ತುಂಬ್ದಾಗ್ಬರ್ತೀಯಂತೆ

ಆಕಾಸ್ದಿಂದ ನೀನು

ಸಾಯಕ್ಮುಂಚೆ ನೋಡ್ಬೇಕ್ನಿನ್ನ 

ಕಾಯ್ತಾಯಿರ್ತೀನ್ನಾನು

ದ್ಯಾವ್ರೆ ನೀನು ಇರೋದಾದ್ರೆ 

ನಂದೊಂದ್ಮಾತು ಕೇಳು 

ಮನುಸ್ರೆಲ್ಲಾ ಒಂದೆ ಅಂತ 

ನೀನೆ ಬಂದು ಹೇಳು

ನೀನೆ ಮಾಡಿದ್ತಪ್ಪು ಇದು 

ನೀನೆ  ಸರಿ ಮಾಡು
ಇಲ್ಲ ಅಂದ್ರೆ ಹುಡಿಕ್ಯಂಬಂದು
ನ್ಯಾಯ ಕೇಳ್ತೀನ್ನೋಡು


"ಭಾವಕಣ"

ನೀನಿಲ್ಲದ ನನ್ನೆದೆ

ನೀನಿಲ್ಲದ ಊರಿನಲಿ
ಕಡುಕತ್ತಲ ರಾತ್ರಿಯಲಿ
ನಿನ ಪ್ರೀತಿಯ ಹುಡುಕಿ ಹೊರಟೆ
ಮಿಣುಕು ಹುಳದ ಬೆಳಕಿನಲಿ

ನೀ ಬೇಡವೆಂದು ಎಸೆದ ಹೃದಯ
ನೀನಿಲ್ಲದೆ ಅದು ಬರೀ ಶೂನ್ಯ
ಇರುಳ ಮೂಲೆಯಲೆಲ್ಲೋ ನಿನಗಾಗಿ ನರಳುತಿದೆ
ಹೂಳಿಡುವ ನರಿಹಿಂಡು ಅದರ ಜಾಡು ಹಿಡಿಯುತಿದೆ

ಕೇಳಲಾರೆ ನನ್ನೆದೆಯ ನೋವಿನಾಕ್ರಂದನ
ಬೇತಾಳ ಮಾಡಿದೆ ಬಿಸಿನೆತ್ತರಿಗೆ ಆಕ್ರಮಣ
ಎದೆಬಿಡುತಿದೆ ಕೊನೆಯುಸಿರು ಶೈಯ್ಯೆಯ ಮೇಲೆ
ನೆನಪುಗಳು ಕಾತರಿಸಿವೆ ಇಡಲು ಬೆಂಕಿ ಜ್ವಾಲೆ

ಅಗೋ ಬೀಳುತಿದೆ ಎದೆ ಕೊರಳಿಗೆ ಯಮಪಾಶ
ಕೊಡದಿದ್ದರೆ ನಿನ್ನೆದೆಯಲಿ ಎನ ಪ್ರೀತಿಗೆ ಅವಕಾಶ
ನಿನ ಪ್ರೀತಿಯೇ ಸಂಜೀವಿನಿ ಕೊಡು ಎದೆಗೆ ಜೀವ
ನಿನ್ನಿಂದಲೇ ಉದಯಿಸಲಿ ಪ್ರೀತಿ ಬೆಳಕ ಕಾವ್ಯ


----------------------------------------
"ಭಾವಕಣ"

ಕತ್ತಲೆ ಸ್ವಾತಂತ್ರ್ಯ

ಸ್ವಾತಂತ್ರ್ಯದ ಹಣತೆಯ ಬೆಳಕು
ಕುಣಿಕೆಯಲ್ಲಿ ನೆತಾಡುತ್ತಿದೆ ಕತ್ತಲೆಯಲಿ
ಬಿಕ್ಕುತ್ತಿದೆ ನಿಜ ಅಸ್ತಿತ್ವಕ್ಕಾಗಿ
ನಡು ರಾತ್ರಿಯಲಿ ಜನಿಸಿ ಬೆಳಕಿಗಾಗಿ

ಸ್ವಾತಂತ್ರ್ಯದ ಹಕ್ಕಿ ರೆಕ್ಕೆಬಡಿಯುತ್ತದೆ
ಪರಿತಪಿಸುತ್ತದೆ ಹಾರಲಾಗದೆ
ಅಧಿಕಾರದ ಜಡಶಿಲೆಯು ಹಿಡಿದಿದೆ ಕಾಲುಗಳ
ರೆಕ್ಕೆ ಬಡಿಯಲಷ್ಠೆ ಅವಕಾಶ
ನ್ಯಾಯದ ಸೂರ್ಯನೂ ಮರೆಯಾಗಿದ್ದಾನೆ
ಅನ್ಯಾಯದ ಕತ್ತಲ ಕಾಲು ಚಲಿಸುತ್ತದೆ
ಕಗ್ಗತ್ತಲ ರಾತ್ರಿಯಲಿ
ಎದುರು ನಿಂತವರ ಎದೆ ಸೀಳಲು
ಸಿಡಿದೆದ್ದವರ ಸೊಲ್ಲಡಗಿಸಲು
ಚಂದಿರನೂ ಬಲಿಯಾಗಿದ್ದಾನೆ ಇರುಳಿಗೆ
ನೆತ್ತರ ಜಲಪಾತ ನರಳಿ ಸುರಿಯುತ್ತದೆ
ಶತಮಾನದ ಕೊಳಕನ್ನು
ಕಡಲಾಳದಲ್ಲಿ ಅಡಗಿಸಲು

ಪ್ರಜಾಪ್ರಭುತ್ವದ ಕೊರಳ ಕಡಿದಿದ್ದಾರೆ
ಅಂದಿನಿಂದಲೂ ಆಳಿದವರು
ಪಿರಂಗಿಯ ಎದುರಿಸಿದ ಕ್ರಾಂತಿಯ ರಕ್ತ
ಇಂದಿಗೂ ಕೊರಗುತ್ತಿದೆ ಅನಾಥವಾಗಿ
ಸ್ವಾತಂತ್ರ್ಯ ವೀರರು ಸೀಮಿತವಾಗಿದ್ದಾರೆ
ಜನ್ಮಾಚರಣೆ ಪುಣ್ಯಸ್ಮರಣೆಗಳಿಗೆ
ರೋಗಗ್ರಸ್ತ ಆಢಳಿತದೊಳಗೆ

ಇತಿಹಾಸವು ಮರೆಯಾಗಿ ಅಳುತ್ತಿದೆ
ಸುಳ್ಳು ಬೋಧನೆಗೆ ನೊಂದು
ಬಚ್ಚಿಟ್ಟಿದ್ದಾರೆ ಅದರ ಪುಟಗಳ
ಹೊಳೆವ ಚಿನ್ನದ ಪಂಜರದಲ್ಲಿ
ಸಮಾಜದ ಕನ್ನಡಿ ಒಡೆದಿದೆ
ಜಾತಿಯ ನೂರು ಬಿಂಬಗಳ ನಡುವೆ
ವಿರಾಮವಿಲ್ಲದೆ ನಡೆಯುತ್ತವೆ ಧರ್ಮಯುಧ್ಧಗಳು
ಭಾರತಾಂಭೆಯ ನಡು ಎದೆಯ ಮೇಲೆ
ಭಯೋತ್ಪಾಧನೆಯ ವಿಷ ಬೀಜಗಳ ಬಿತ್ತಿ

ಸ್ವಾತಂತ್ರ್ಯದ ಹಕ್ಕಿ ಶಿಲೆಯಾಗುತ್ತದೆ
ಎಂದಿಗೂ ಸಾಯದೆ
ಬದುಕಲಾಗದೆ,ಹಾರಲಾಗದೆ
ರೆಕ್ಕೆ ಬಡಿಯಲಷ್ಠೇ ಅವಕಾಷ....


------------------------------------------
"ಭಾವಕಣ"

ಸಮಾನತೆಯ ಸೂರ್ಯ

ಜಗಕೆಲ್ಲ ಸುರಿಯಲಿ ನವಯುಗದ ಜಡಿಮಳೆ
ಕೊಚ್ಚಿಕೊಂಡೊಯ್ಯಲಿ ಜಾತೀಯತೆಯ ಕೊಳೆ
ಉರಿವ ಸೂರ್ಯನುರಿಸಿಬಿಡಲಿ ಮತಭೇದದ ಸಾರ
ಅಸಮಾನ ಸಮಾಜವೇ ತೊಲಗು ದೂರ ದೂರ

ತಾಯಿಯಿಲ್ಲ ತಂದೆಯಿಲ್ಲ ಯಾರೋ ಕೊಟ್ಟ ಜನ್ಮ
ಹೇಗೆ ಹುಟ್ಟಿ ಬೆಳೆಯಿತೊ?ಜಾತಿ ಮುಳ್ಳು ತಮ್ಮ
ಕುಡಿವನೀರೂ ಅವನದಂತೆ ಬೆಳೆದ ಬೆಳೆಯು ಕೂಡ
ಒಂದೇ ನೆತ್ತರಲ್ಲೂ ಭೇದ ಮಾಡಿಬಿಟ್ಟ ಮೂಢ

ಎಲ್ಲರಿಗೂ ಒಂದೆ ಗಾಳಿ ಒಂದೆ ನೆಲದ ಅನ್ನ
ಮರೆತು ಅದನು ಜಾತಿ ಭೂತ ಕೊರೆದ ಮನಕೆ ಕನ್ನ
ಒಡೆಯಿತು ಹೋಳಾಯಿತು ಮಾನವತೆಯ ಧರ್ಮ
ಬುಧ್ಧ ಬಸವರಿದ್ದರೂ ಅಳಿಯದದರ ಮರ್ಮ

ದುಡಿಯದವಗೆ ಎಲ್ಲಾ ಇಲ್ಲಿ ದುಡಿವಗೇನೂ ಇಲ್ಲ
ಮೇಲಿನವ ದಬ್ಬಾಳಿಕೆಯಲಿ ಕಸಿದುಕೊಂಡನೆಲ್ಲ
ಬೀಳುತಿದೆ ಬಡವನ ಕತ್ತಿಗೆ ಹಸಿವಿನ ಕುಣಿಕೆ
ಸಿರಿವಂತ ಮಾಡುತಿರಲು ಮುಚ್ಚಿಟ್ಟ ಹಣದ ಏಣಿಕೆ

ಮುಂದೊದು ದಿನ ಹುಟ್ಟಿ ಬರಲಿ
ಸಮಾನತೆಯ ಸೂರ್ಯ
ಸಮಬಾಳು ಕೊಡಲಿ ಸರ್ವರಿಗೂ
ಅಳಿಸಿ ಜಾತಿ ಕ್ರೌರ್ಯ


---------------------------------------

"ಭಾವಕಣ"

ನೀ ಬರುವ ತನಕ..........

ಇರುಳ ಮೂಲೆಯಲಿ ಖಾಲಿ ಹೃದಯ
ಹಾಡುತಿದೆ ಒಂಟಿ ರಾಗ
ರಾತ್ರಿಯಿಡೀ ಅಲೆಯುವ ಬಿಕಾರಿಚಂದ್ರನಂತೆ
ನೀ ಬರುವತನಕ ಯಾವೂದೂ ಬೆಳಗುವುದಿಲ್ಲ
ನನ್ನೆದೆ ನಭದ ಸೂರ್ಯನೂ ಕೂಡ
ಕತ್ತಲೆ ಹೊದ್ದು ಮಲಗಿದ್ದಾನೆ ಗ್ರಹಣ ಬಡಿದು

ನೀ ಬರುವತನಕ ಈ ಏಕಾಂತವು
ಮೈಮುರಿದೇಳದು ಸೋಮಾರಿ
ನನ್ನೊಳಗಿಹ ನಿನ್ನ ನೆನಪುಗಳ
ನೆರಳು ಬೆಳಕಿನಾಟದಲಿ
ಹೃದಯ ದಣಿದಿದೆ ಪ್ರೀತಿ ಹಸಿವಲಿ

ನೀ ಬರುವತನಕ ಮುರಿಯದು ಈ ಮೌನ
ಸುರಿಯದು ನೋವ ಕಣ್ಣೀರು
ನೀನಿಲ್ಲದೆ ನಾ ಒಂಟಿ ಎಂಬ ಭಾವವ
ನೀನುಳಿಸಿದೆ ನನ್ನೊಳಗೆ
ಅಗೋ ಅದು ಸುಡುತಿದೆ ಮನಸು ಕನಸುಗಳ
ಅಣಕಿಸುತಿದೆ ನಿನ್ನ ನಗು
ಈ ನನ್ನ ಅಸಹನೀಯ ಒಂಟಿತನವನು

ನೀ ಬರುವತನಕ ಕರಗದು ಈ ಕ್ರೂರ ಇರುಳು
ಬಾಹುಗಳಲಿ ಬಂದಿಸಿದೆ ನನ್ನ ಅಸ್ತಿತ್ವವ
ನಿನಗಾಗಿ ಕಾದಿಹ ಕಂಗಳ ಕಟ್ಟಿ
ಓ ಪ್ರೀತಿಯೇ ಕರುಣೆಯಿರಲಿ
ಈ ಹೃದಯ ನಿನ್ನ ಬಳಿ ಇದೆ
ಮರಳಿ ತಾ ನಿನ್ನ ಪ್ರೀತಿಯೊಂದಿಗೆ
ಇರುಳ ಕಳೆವ ನೇಸರನಂತೆ
ಉಳಿದಿಹ ನಿನ್ನ ಪ್ರೀತಿ ಕಾಳಜಿಗಳ
ತಿರುಗಿಸು ನನ್ನ ಮೌನದ ಕಡೆಗೆ
ಮೌನ ಮಾತಾಗಲಿ
ನೀ ಬರುವ ತನಕ..........

---------------------

"ಭಾವಕಣ"

ಕಾಲಗರ್ಭ

ಕಾಲಗರ್ಭದ ಕೂಸು
ಹುಟ್ಟಿ ಬರುವುದು ನಾಳೆ
ಕಲಿಯ ಕುದುರೆ ಬೆನ್ನನೇರಿ
ಮಿಂಚು ಖಡ್ಗ ಹೊರೆಯಲಿರಿಸಿ
ಉರಿವ ರವಿಯ ಒಡಲಿನಿಂದ
ಹರನ ತಿರುಗಣ್ಣಿನಿಂದ
ಅಸಮಾನತೆಯ ನಡುಮುರಿದು
ಜಾತಿ ಜಗದ  ಕೊರಳ ಕಡಿದು
ಮನದಿ ಕವಿದ ಇರುಳ ತೊಡೆದು
ಮನ್ವಂತರದ ದೀಪ ಹಿಡಿದು
ಬೆಳಗುವುದು ಈ ನೆಲವ
ಮಾನವತೆಯ ಜಗದಲಿ.....


ಭಾವಕಣ...