"ಮೌನ-ಮಂಥನ"

ಒತ್ತರಿಸಿ ಬಂದೆದೆಯ ಅಳುವ ನುಂಗಿ
ಪಧ್ಯ ಗೀಚುತಿಹೆ ಪದವ ಹೊಸೆದು
ನನ್ನ ಕವಿತೆಯನೋದಿ ನನ ಕಣ್ಣೆ ಹನಿಯುತಿವೆ
ಸನಿಹವಿಲ್ಲದ ನಿನ್ನ ನಗುವ ನೆನೆದು

ಒಡಲ ಪಿಸುಮಾತುಗಳ ಅರಿಯಲಾಗದ ನೀನು
ಮನದ ಮಾತು ಕೇಳಬಲ್ಲೆಯ
ಶಿಲೆಯೆದೆಯ ಮೌನ ಮಾತಾಗಿ ಹನಿಯಬೇಕು
ಕಾರ್ಮೋಡ ಚೆಲ್ಲೆ ಹನಿಯ

ನಿನ ನೆನಪು ಕಡೆಗೋಲು ಮಥಿಸುತಿದೆ ಎದೆಯ
ಇತಿಮಿತಿಯಿಲ್ಲದ ಪಥದಿ
ಕಂಪಿಸುತಿದೆ ಎದೆ ಸೋತು ತಂಪೆರೆಯದೀ ಪ್ರೀತಿಯಲಿ
ಹನಿ ಕಾಯ್ದ ನೆಲದ ತೆರದಿ

ಒಲೆಯ ಮೇಲಿನ ಮಡಕೆ  ತೆಗೆಯಬೇಡ ಬೇಗ
ಅನ್ನವಾಗಲಿ ಹಸಿವಿಗೆ
ಬೆಂಕಿಯೊಳಗಣ ಚಿನ್ನ ಕರಗಲಿ ಬಿಡು ಅದು
ಒಡವೆ ನಿನ್ನ ಮುದ್ದುಕಿವಿಗೆ

ಕಾಲಕಳೆದರೂ ಹೊಸತು ಹಳತಲ್ಲ ನಿನ್ನೊಲವು
ನವತನುವ ಚೆಲುವು
ನಲಿದ ಘಳಿಗೆಗಳನೆಲ್ಲ ಮರೆಯಲೊಲ್ಲದು ಮನವು
ನೀನಿರದೆಲೆ ಉಂಟೆ ಗೆಲುವು
------------------------------------------
"ಭಾವಕಣ"