ಜೈ ಭೀಮ

ಶತ ಶತಮಾನಗಳ ನೋವುಂಡ
ಮಾನವತೆಯ ಗರ್ಭದಿಂದ
ಸಿಡಿದು ಬೆಳಗಿದ ಸೂರ್ಯ ಜೈಭೀಮ
ಭಾರತಾಂಭೆಯ ಒಡಲ
ನವ ಮನ್ವಂತರದ ಸಿಡಿಲು
ಸಮಾನತೆಯ ಸರದಾರ ಜೈಭೀಮ

ಅಸಮಾನತೆಯುರಿಯೊಳು
ತಾಯಿಭಾರತಿಯುರಿಯೆ
ಸಂತೈಸಲುದಯಿಸಿದ ಭುವಿಯ ಬೆಳಕೆ
ನೊಂದು ಸೋತವರ ಮಡಿಲು
ಅತ್ತು ಹಸಿದವರ ನೆರಳು
ಗೌತಮನ ಪ್ರತಿರೂಪ ನೀನು ಜಗಕೆ

ನೀ ನಡೆದ ಹಾದಿಯಲಿ
ಮಾನವತೆಯ ಮರಗಳೆದ್ದು
ಸಮಾನತೆಯ ನೆರಳನ್ನು ಸೂಸುತ್ತಿವೆ
ನಿನ್ನ ಅಧಮ್ಯ ಚಿಂತನೆಗಳು
ನಮ್ಮ ಹೃದಯಗಳನ್ನು
ಭೀಮ ಜ್ಯೋತಿಗಳಾಗಿ ಬೆಳಗುತ್ತಿವೆ

ಜಾತಿ-ಮತದ ಹೆಸರಲರಿದ
ಕಡುರುದಿರದ ಕಲೆಗಳಳಿಸಿ
ಸಾಂತ್ವಾನದ ಹೆಗಲಾದ ಪ್ರೀತಿ ಸಿಂಚನವೆ
ಮಾನವತೆಯ ಶ್ರೇಷ್ಠತೆಯನು
ಜಗದಗಲಕೂ ಬೆಳಗಿಸಿದ
ಸಮ ಸಂವಿಧಾನದ ಜೀವ ಚೇತನವೆ

---------------------------------------
                                 "ಜೀವಕಣ"