"ನನ್ನಮ್ಮ"

ಹೊಟ್ಟೆಯಲಿ ಒದ್ದಾಗ ನೋವುಂಡು ನಕ್ಕವಳು
ಹಟ್ಟಿಯಲಿ ಬಿದ್ದಾಗ ನನ ಕೂಡಿ ಅತ್ತವಳು
ನವಮಾಸ ಹೊತ್ತವಳು
ಕಡಲಾಳದ ಮುತ್ತಿವಳು
ಬದುಕಿವಳು ಬೆಳಕಿವಳು
ಹಾಲೂಡಿದ ಹಡೆದವಳು

ಹರಿದ ಸಿರೆಗಳನುಟ್ಟೇ ಸಿರಿಯ ಕಂಡವಳು
ನಮಗುಣಿಸಿ ತಾನುಣದೆ ಮುಗುಳುನಕ್ಕವಳು
ಬರೆದೋದಲು ಬರದೆಯೂ
ಬದುಕು ಕಲಿಸಿದಳು
ಒಡಲಿವಳು ಮಡಿಲಿವಳು
ನನ್ನೆದೆಯ ಧನಿಯಿವಳು

ಕಡುಕಷ್ಠ ಬಡತನಕೆ ಎದೆಗುಂದದವಳು
ಬಿಸಿಲು ಮಳೆ ಲೆಕ್ಕಿಸದೇ ಕೂಲಿ ಮಾಡಿದವಳು
ಎದೆ ನೆತ್ತರು ಬಸಿದು ನಮ್ಮ
ಎದೆಯೆತ್ತರ ಬೆಳೆಸಿದವಳು
ನನ್ನವಳು ಕಣ್ಣಿವಳು
ಗುರಿ ತೋರಿದ ಗುರು ಇವಳು

ಸೋಲುಗಳನೇ ಗೆಲುವಾಗಿಸಿ ನೋವು ಮರೆಸಿದಳು
ಎದುರು ನಕ್ಕು ಒಳಗೆ ಬಿಕ್ಕಿ ನೊಂದು ಬೆಂದವಳು
ಬರಿಗಾಲಲೇ ತಾನು ನಡೆದು
ನಮ್ಮ ಹೆಗಲಲೊತ್ತವಳು
ನಗು ಇವಳು ಮಗುವೆ ಇವಳು
ನನ್ನಾತ್ಮವೇ ಆಗಿಹಳು ನನ್ನಮ್ಮ