"ಬಿಡಿಸದನುಬಂಧ"

ಈಗಷ್ಠೇ ಕತ್ತಲು ಸಂಜೆಯ ಕೊರಳು ಹಿಸುಕಿ
ಕತ್ತಲೆಯಲ್ಲೇ ಮರೆಯಾಯ್ತು!
ಚಂದಿರನೇ ಬೆಳದಿಂಗಳ ನುಂಗಿದ
ನಿನ್ನ ಬೇಸರ ನನಗೆ ಹೀಗೇ ನೋಡು
ಸ್ವರದರಿವಿರದ ಕೋಗಿಲೆಯ ಹಾಡು
ನಿನ್ನ ದುಂಡು ಮುಖದಲ್ಲಿ ನಾನು
ಸದಾ ನಗುವನ್ನೇ ಕಂಡಿದ್ದೇನೆ
ಇಂದು ನಿನ್ನಳುವನ್ನರಗಿಸಿಕೊಳ್ಳದ ಹೃದಯ
ವಾಡಿಕೆಗಿಂತ ಹೆಚ್ಚೇ ಬಡಿಯುತ್ತಿದೆ
ನೀನಂತೂ ಮೌನವಾಗಿದ್ದೀಯ
ಈಗ ಅದೇ ನನ್ನೆದೆ ಸುಡುವ ಕಿಡಿಯಾಗಿದೆ


ಈಗಷ್ಠೇ ಬಿರುಗಾಳಿಯು ತಂಗಾಳಿಯ ಎದೆಬಗೆದು
ಆಲಬ್ಬರಿಸುತ್ತಾ ಮರೆಯಾಯ್ತು
ನಿನ್ನ ನಿಶ್ಚಲ ನೋಟವು ನನ್ನೆದೆಯಲ್ಲಿ
ಎಬ್ಬಿಸಿದ ಕೋಲಾಹಲವೂ ಹೀಗೆ
ಕಡಲೇ ಅಲೆಗಳ ನುಂಗಿದ ಹಾಗೆ
ನನ್ನ ಪ್ರತಿ ಮಾತಿಗೂ ಕಿವಿಯಾಗುತ್ತಿದ್ದ ನೀನು
ನನ್ನೆಡೆಗೆ ಬೆನ್ನು ತಿರುಗಿಸಿದ್ದೀಯ
ನಿನ್ನ ಚೆಲುವನ್ನು ಮುನಿಸು ನುಂಗುತಿದೆ
ನನ್ನೆಡೆಗೆ ತಿರುಗು,ಎದೆಗೆ ಒರಗು
ನೀನಂತೂ ನನಗೆ ಪ್ರೀತಿಯೇ ಆಗಿರುವೆ
ಅದೇ ನಮ್ಮಿಬ್ಬರ ಬಂಧಿಸಿದ ಬಂಧವಾಗಿದೆ
ಬಿಡಿಸದನುಬಂಧವಾಗಿದೆ

-------------------------------------------------------------------
                          "ಭಾವಕಣ"